पांचगणी न्यूज नेटवर्क
कराड : लाडक्या बाप्पाच्या आगमनाची उत्सुकता शिगेला पोहोचली असून कराडच्या बाजारपेठेत विविध रूपांतील आकर्षक गणेशमूर्ती विक्रीसाठी दाखल झाल्या आहेत. मात्र, यंदा बाप्पाच्या भक्तांना महागाईच्या झळा सहन कराव्या लागणार असून, गणेशमूर्तींच्या किंमतीत सरासरी २० टक्क्यांनी वाढ झाली आहे. कच्च्या मालाचे गगनाला भिडलेले दर, रंग-सजावटीचे साहित्य, वाहतूक खर्च आणि मजुरीतील वाढ यामुळे गणेशमूर्ती घडवणे कमालीचे महागले असून त्याचा थेट फटका भाविकांच्या खिशाला बसत आहे.
गणेशोत्सवाच्या पार्श्वभूमीवर घरगुती गणपतींसह विविध सार्वजनिक गणेश मंडळांकडून मूर्तींची आगाऊ नोंदणी (बुकिंग) सुरू झाली आहे. मूर्तिकारांच्या कार्यशाळांमध्ये अखेरचा हात फिरवण्याचे काम वेगात सुरू असून बाप्पाच्या विविध मनमोहक रूपांनी बाजारपेठ सजली आहे. परंतु, मूर्ती निर्मितीसाठी लागणाऱ्या शाडूची माती आणि प्लास्टर ऑफ पॅरिसच्या (पीओपी) पोत्यांच्या दरात लक्षणीय वाढ झाली आहे. याशिवाय वॉटर कलर्स, ऑईल पेंट, विविध प्रकारची चकाकणारी नक्षीदार सजावट आणि मूर्ती सुरक्षितपणे पोहोचवण्यासाठी लागणारा वाहतूक खर्च मोठ्या प्रमाणावर वाढला आहे. गणेशमूर्ती तयार करणाऱ्या कुशल कारागिरांची मजुरीही वाढल्याने मूर्तिकारांचा उत्पादन खर्च कमालीचा वाढला आहे.
गेल्या वर्षीच्या तुलनेत यंदा मूर्ती तयार करण्याचा एकूण खर्च २५ ते ३० टक्क्यांनी वाढल्याचे सांगत, दरांमध्ये वाढ करणे अपरिहार्य असल्याचे स्थानिक मूर्तिकारांचे म्हणणे आहे. लहान आकाराच्या घरगुती मूर्तींपासून ते अगदी भव्य व आकर्षक कलाकुसर असलेल्या सार्वजनिक मंडळांच्या मूर्तींपर्यंत सर्वच प्रकारच्या गणपतींच्या दरात २० टक्क्यांपर्यंत वाढ झाली आहे. विशेषत: पर्यावरणपूरक शाडूच्या मातीच्या मूर्तींच्या दरात आणि अत्यंत सुबक, विशेष नक्षीकाम असलेल्या मूर्तींच्या किंमतीत अधिक वाढ पाहायला मिळत आहे.
वाढत्या महागाईमुळे यंदा मूर्ती खरेदीसाठी भाविकांना अधिक पैसे मोजावे लागत असले, तरी गणेशभक्तांच्या उत्साहात मात्र कोणतीही कमतरता दिसून येत नाही. आपल्या लाडक्या बाप्पाची मूर्ती अतिशय सुंदर आणि आकर्षक असावी यासाठी भक्त दराचा विचार न करता आवडीच्या मूर्तीची निवड करत आहेत. महागाईचे सावट असले तरी कराड शहरासह ग्रामीण भागात गणेशोत्सवाचा आनंद आणि बाप्पाच्या स्वागताचा जल्लोष ओसंडून वाहत आहे.
