पांचगणी न्यूज नेटवर्क
पाचगणी : नेहमीच्या अभ्यासाच्या चौकटीबाहेर जाऊन विद्यार्थिनींना वास्तव जीवनातील सुरक्षेचे धडे देण्याच्या उद्देशाने पाचगणी येथील विद्या निकेतन हायस्कूलमध्ये विशेष जनजागृती उपक्रमाचे आयोजन करण्यात आले. शाळेचे मुख्याध्यापक अथर्व बिरामणे यांच्या पुढाकारातून आणि पाचगणी पोलीस ठाण्याच्या सहकार्याने पार पडलेल्या या कार्यक्रमात पांचगणी पोलीस ठाण्याचे सहाय्यक पोलीस निरीक्षक दिलीप पवार, पोलीस कर्मचारी जाधव व अमोल जगताप यांनी विद्यार्थिनींशी थेट व मैत्रीपूर्ण संवाद साधत मार्गदर्शन केले.
या कार्यक्रमादरम्यान विद्यार्थिनींच्या सुरक्षिततेच्या दृष्टीने अत्यंत संवेदनशील असलेल्या “गुड टच – बॅड टच” या विषयावर सविस्तर चर्चा करण्यात आली. कोणत्याही अयोग्य किंवा संशयास्पद प्रसंगी गप्प न राहता विश्वासू व्यक्तींशी किंवा शिक्षकांशी त्वरित संवाद साधण्याचे महत्त्व यावेळी पटवून देण्यात आले. यासोबतच डिजिटल युगातील वाढते धोके लक्षात घेता सोशल मीडियाचा वापर करताना घ्यावयाची काळजी, अनोळखी व्यक्तींपासून सुरक्षित अंतर आणि सायबर गुन्ह्यांपासून बचावाचे मार्ग यावर अधिकाऱ्यांनी प्रकाश टाकला.
शाळेतील व घरातील सुरक्षिततेसोबतच रॅगिंगचे दुष्परिणाम, त्यासंदर्भातील कडक कायदेशीर तरतुदी आणि आपत्कालीन परिस्थितीत ‘११२’ या हेल्पलाइन क्रमांकाचा वापर कसा करावा, याची प्रात्यक्षिकांसह माहिती देण्यात आली. किशोरवयातील शारीरिक व मानसिक बदल स्वीकारताना आत्मविश्वास कसा वाढवावा आणि योग्य निर्णयक्षमता कशी विकसित करावी, यावरही पोलिसांनी मार्गदर्शन केले.
कार्यक्रमाच्या उत्तरार्धात विद्यार्थिनींनी विचारलेल्या विविध प्रश्नांचे पोलिसांकडून निरसन करण्यात आले. या संवादात्मक उपक्रमामुळे विद्यार्थिनींमध्ये सुरक्षेची जाणीव निर्माण होण्यासोबतच जबाबदार नागरिक बनण्याचा नवा आत्मविश्वास निर्माण झाला आहे.
