पांचगणी न्यूज नेटवर्क
पांचगणी : स्वातंत्र्याचा अमृतकाळ अनुभवणाऱ्या संपूर्ण देशात १५ ऑगस्टचा उत्साह ओसंडून वाहत असताना, पांचगणी येथील अमर एज्युकेशनल अँड सोशल डेव्हलपमेंट ऑर्गनायझेशन संचलित अॅस्टॉन हॉस्टेल व नचिकेतास हायस्कूल अँड ज्युनिअर कॉलेजमध्ये ७९ वा स्वातंत्र्यदिन मोठ्या दिमाखात, शिस्तबद्धता आणि देशभक्तीच्या भावपूर्ण वातावरणात साजरा करण्यात आला. संपूर्ण शाळा परिसर मनमोहक तिरंगी सजवटीने नटला होता, तर सकाळपासूनच विद्यार्थी, शिक्षक आणि पालकांच्या चेहऱ्यावर अभूतपूर्व उत्साह पाहायला मिळाला.
कार्यक्रमाची मुख्य सुरुवात अतिशय रुबाबदार आणि नेत्रदीपक अशा शिस्तबद्ध परेडने झाली. परेड कमांडर कुमारी साक्षी पाटेकर, संस्कृती मोरे, सई बिरामणे, आरवी भोसले, देविका पवार आणि कुमार दक्ष पाटील, प्रिन्स कुमार, लवेश पाटील, दिशांक शिंदे, जिग्नेश पाटील यांनी इतर सर्व विद्यार्थ्यांसह आकर्षक गणवेशात मैदानावर दिमाखदार संचलन करत मान्यवरांना मानवंदना दिली. विद्यार्थ्यांच्या या पाऊलगणिक शिस्त, ऐक्य आणि राष्ट्रप्रेमाच्या हुंकाराने उपस्थित जनसमुदाय मंत्रमुग्ध झाला. विद्यार्थ्यांनी एकसुरात दिलेल्या ‘भारत माता की जय’च्या घोषणांनी परिसर दुमदुमून गेला होता.
यानंतर सोहळ्यातील मुख्य टप्पा असणारा ध्वजारोहणाचा कार्यक्रम पार पडला. डॉ. महेश भिलारे यांच्या शुभहस्ते राष्ट्रध्वज फडकवण्यात आला आणि सर्वांनी शिस्तबद्ध पद्धतीने राष्ट्रगीताचे गायन करून तिरंग्याला कडकडून सलामी दिली.
ध्वजारोहणानंतर विद्यार्थ्यांच्या अंगातील ऊर्जा आणि समन्वयाचे दर्शन घडवणारे मानवी पिरॅमिड हे या सोहळ्याचे विशेष आकर्षण ठरले. विद्यार्थ्यांनी अत्यंत जिद्द, परस्पर विश्वास आणि संघभावनेच्या जोरावर एकावर एक थरांचे मानवी पिरॅमिड यशस्वीरीत्या साकारले. या साहसी सादरीकरणाने उपस्थितांच्या छाती अभिमानाने फुलून आल्या आणि टाळ्यांच्या कडकडाटात मैदान गूंजले. त्यानंतर विद्यार्थ्यांनी सुरेल आवाजात देशभक्तीपर गीते आणि भारताच्या विविधतेतील एकतेचे दर्शन घडवणारी जोशपूर्ण नृत्ये सादर केली. आकर्षक वेशभूषा आणि उत्स्फूर्त भावमुद्रांमधून विद्यार्थ्यांनी स्वातंत्र्यसैनिकांच्या त्यागाची जाणीव करून दिली.
प्रमुख पाहुणे डॉ. महेश भिलारे यांनी आपल्या प्रेरणादायी भाषणात विद्यार्थ्यांना केवळ परीक्षेत यश न मिळवता देशाचे सुजाण, जबाबदार आणि नीतिमूल्ये जपणारे नागरिक बनण्याचे आवाहन केले. देशाच्या प्रगतीत तरुणांचे योगदान किती महत्त्वाचे आहे, यावर त्यांनी प्रकाश टाकला. संस्थेचे संस्थापक विश्वस्त अमर विजय बिरामणे यांनी विद्यार्थ्यांच्या कलागुणांचे कौतुक करत, स्वातंत्र्यदिन हा राष्ट्राप्रती कर्तव्ये जाणून घेण्याचा पवित्र दिवस असल्याचे प्रतिपादन केले.
शिक्षकांचे योग्य मार्गदर्शन, विद्यार्थ्यांची अहोरात्र मेहनत आणि पालकांचा उदंड प्रतिसाद यामुळे हा सोहळा नचिकेतास हायस्कूलच्या इतिहासात सुवर्ण अक्षरांनी लिहिला गेला आहे. ‘वंदे मातरम्’ आणि ‘भारत माता की जय’च्या गजरात या अभूतपूर्व राष्ट्रोत्सवाची सांगता झाली.
