पांचगणी न्यूज नेटवर्क
महाबळेश्वर : कडवी आव्हाने, तीव्र स्पर्धा आणि जिद्दीच्या जोरावर महाबळेश्वरच्या कन्या कु. कृष्णा प्रमोद पवार हिने राष्ट्रीय स्तरावर आपल्या क्रीडा कौशल्याचा डंका वाजवला आहे. उत्तर प्रदेशातील गाझीपूर येथे आयोजित करण्यात आलेल्या ‘राष्ट्रीय विशेष ऑलिम्पिक पॉवरलिफ्टिंग चॅम्पियनशिप’ आणि ‘राष्ट्रीय सीनियर पॉवरलिफ्टिंग चॅम्पियनशिप’ स्पर्धेत ५२ किलो वजनी गटात अफाट कामगिरी करत कृष्णाने सुवर्ण पदकावर आपले नाव कोरले. तिच्या या नेत्रदीपक यशामुळे महाबळेश्वर शहरासह संपूर्ण सातारा जिल्हा व महाराष्ट्राच्या शिरपेचात मानाचा तुरा रोवला गेला आहे.
उत्तर प्रदेशातील गाझीपूर येथे २९ ऑगस्ट ते ३ सप्टेंबर या कालावधीत पार पडलेल्या या राष्ट्रीय स्पर्धेत देशभरातून अनेक नामांकित व कसलेल्या पॉवरलिफ्टर्सनी सहभाग घेतला होता. अत्यंत चुरशीच्या ठरलेल्या या स्पर्धेत कृष्णाने आपल्या शिस्तबद्ध सराव, अचूक तंत्र आणि अभूतपूर्व आत्मविश्वासाच्या बळावर प्रतिस्पर्ध्यांवर मात करत प्रथम क्रमांक पटकावला आणि सुवर्ण पदकाला गवसणी घातली.
महाबळेश्वर येथील मुनव्वर हौसिंग सोसायटीची रहिवासी असलेल्या कृष्णाने अत्यंत प्रतिकूल परिस्थितीत आणि कठोर परिश्रमाच्या जोरावर क्रीडा क्षेत्रात हे उत्तुंग यश संपादन केले आहे. तिच्या या ऐतिहासिक यशाबद्दल महाबळेश्वर येथील एकता गणेश मित्र मंडळ आणि मुनव्वर हौसिंग सोसायटीतील सर्व सभासद तसेच स्थानिक नागरिकांच्या वतीने तिचा विशेष नागरी सत्कार करण्यात आला.
गिरीस्थान नगर असणाऱ्या महाबळेश्वरच्या मातीतील खेळाडूंनी राष्ट्रीय आणि आंतरराष्ट्रीय पातळीवर चमकदार कामगिरी करण्याची परंपरा कृष्णाने पुढे चालू ठेवली आहे. तिच्या या यशामुळे तालुक्यातील उगवत्या खेळाडूंना आणि विशेषतः क्रीडा क्षेत्रात करियर करू इच्छिणाऱ्या तरुणींना मोठी प्रेरणा मिळणार आहे. कृष्णाच्या या दैदिप्यमान यशामुळे महाबळेश्वर परिसरातून तिच्यावर कौतुकाचा व भावी उज्ज्वल वाटचालीसाठी शुभेच्छांचा वर्षाव होत आहे.
