पांचगणी न्यूज नेटवर्क
पाचगणी : लाडक्या बाप्पाला भावपूर्ण निरोप देण्यासाठी पाचगणी शहर सज्ज झाले असून, गणेश विसर्जनाच्या पार्श्वभूमीवर प्रशासनाने तयारीचा वेग वाढवला आहे. पाचगणीतील प्रसिद्ध टेबललँड येथील मुख्य विसर्जन स्थळाची नगरपालिका आणि पोलीस प्रशासनाच्या वरिष्ठ अधिकाऱ्यांनी संयुक्त पाहणी करून तयारीचा सविस्तर आढावा घेतला.
या पाहणीवेळी सहाय्यक पोलीस निरीक्षक दिलीप पवार, नगरपालिकेचे मुख्याधिकारी पंडित पाटील आणि नगराध्यक्ष दिलीप बागडे प्रमुख उपस्थित होते. विसर्जनाच्या दिवशी टेबललँड परिसरात हजारो गणेशभक्तांची मोठी गर्दी होण्याची शक्यता लक्षात घेऊन गर्दीचे नियोजन, वाहतूक व्यवस्था, कायदा व सुव्यवस्था आणि सुरक्षिततेच्या दृष्टीने आखलेल्या उपाययोजनांवर यावेळी सविस्तर चर्चा करण्यात आली.
सहाय्यक पोलीस निरीक्षक दिलीप पवार यांनी उपस्थित पोलीस कर्मचाऱ्यांना मार्गदर्शन करताना स्पष्ट केले की, विसर्जन मिरवणुका आणि दर्शनासाठी येणाऱ्या नागरिकांची गर्दी नियंत्रणात ठेवण्यासाठी पोलिसांनी अत्यंत सतर्क राहावे. विसर्जन स्थळाकडे येणाऱ्या वाहनांची पार्क करण्याची जागा, नागरिकांच्या येण्या-जाण्याचे स्वतंत्र मार्ग आणि विसर्जन प्रक्रिया शिस्तबद्ध पद्धतीने पार पाडण्यासाठी पोलीस व पालिका कर्मचाऱ्यांनी एकमेकांशी उत्तम समन्वय ठेवून काम करावे, अशा सूचना त्यांनी दिल्या.
मुख्याधिकारी पंडित पाटील यांनी पालिका कर्मचाऱ्यांना विसर्जन स्थळाची स्वच्छता, निर्माल्य संकलन आणि कचरा व्यवस्थापनाबाबत कडक निर्देश दिले. विसर्जन संपल्यानंतर लगेचच परिसर स्वच्छ करून पूर्ववत करण्यासाठी अतिरिक्त स्वच्छता कर्मचाऱ्यांची पथके तैनात करण्यात आली आहेत. पर्यावरणपूरक पद्धतीने विसर्जन पार पडावे यासाठी निर्माल्य कलशांची विशेष सोय करण्यात आल्याचे त्यांनी सांगितले.
नगराध्यक्ष दिलीप बागडे यांनी सर्व विभागांमध्ये योग्य समन्वय ठेवून भाविकांना मूलभूत सुविधा उपलब्ध करून देण्याचे निर्देश दिले. “पाचगणीतील गणेशोत्सव हा नेहमीच शांततेत आणि उत्साहात साजरा होतो. यंदाही गणेशभक्तांना कोणत्याही प्रकारचा त्रास होणार नाही आणि विसर्जन सोहळा शांततेत पार पडेल, यासाठी पालिका प्रशासन पूर्ण खबरदारी घेत आहे,” असे त्यांनी नमूद केले.
पाहणीदरम्यान अधिकाऱ्यांसह कर्मचारी वर्गाने प्रत्यक्ष विसर्जन स्थळाची पाहणी करून संभाव्य अडचणींचा अंदाज घेतला आणि आपत्कालीन परिस्थिती हाताळण्यासाठी आवश्यक त्या सूचना दिल्या. पाचगणी शहरात गणेशोत्सवाच्या काळात शांतता व सुव्यवस्था कायम राखण्यासाठी पोलीस प्रशासनाने विशेष बंदोबस्त तैनात केला आहे. सर्व गणेशभक्तांनी व मंडळांनी प्रशासनाने दिलेल्या नियमांचे पालन करून विसर्जन सोहळा शांततेत, शिस्तबद्ध आणि उत्साहपूर्ण वातावरणात पार पाडावा, असे आवाहन प्रशासनाच्या वतीने करण्यात आले आहे.
