पांचगणी न्यूज नेटवर्क
पाचगणी : आल्हाददायक हवामान आणि शैक्षणिक दर्जासाठी प्रसिद्ध असलेल्या पाचगणीतील नामांकित संजीवन विद्यालयाच्या शिरपेचात आणखी एक मानाचा तुरा खोवला गेला आहे. विद्यालयाची २०२३ ची माजी विद्यार्थिनी अनन्या मेरी सेबॅस्टियन हिची भारतीय लष्कराच्या शॉर्ट सर्व्हिस कमिशन (NCC Special – Women, 124 वा कोर्स) अंतर्गत अधिकारी म्हणून निवड झाली आहे. तिच्या या दैदिप्यमान यशामुळे संजीवन विद्यालयासह संपूर्ण पाचगणी परिसरातून तिच्यावर कौतुकाचा वर्षाव होत आहे.
लहानपणापासूनच शिस्त, नेतृत्वगुण आणि देशसेवेची आवड असणाऱ्या अनन्याचा हा प्रवास अत्यंत प्रेरणादायी राहिला आहे. एनसीसीच्या माध्यमातून लष्करी सेवेची पायाभरणी करत तिने कठोर परिश्रम आणि आत्मविश्वासाच्या बळावर भारतीय सैन्यात थेट अधिकारी पदापर्यंत मजल मारली आहे. तिची निवड ही केवळ तिच्या कुटुंबीयांसाठीच नव्हे, तर तिला घडवणाऱ्या संजीवन विद्यालयासाठी अत्यंत अभिमानास्पद बाब ठरली आहे.
लष्करी सेवेतील प्रवेशाच्या पुढील टप्प्यासाठी अनन्याला २४ सप्टेंबर रोजी ऑफिसर्स ट्रेनिंग अकादमी (OTA), चेन्नई येथे हजर राहण्याचे निर्देश देण्यात आले असून, तिथे ती तिचे खडतर आणि सन्मानजनक लष्करी प्रशिक्षण पूर्ण करणार आहे. संजीवन विद्यालयात मिळालेले संस्कार, क्रीडा क्षेत्रातील सहभाग आणि सैनिकी शिस्तीमुळेच तिला हे यश संपादन करता आले.
अनन्याच्या या अभूतपूर्व यशाबद्दल संजीवन विद्यालय प्रशासनाने तिचा विशेष गौरव केला असून, तिच्या पुढील उज्ज्वल भविष्यासाठी आणि राष्ट्रसेवेच्या प्रवासासाठी मनःपूर्वक शुभेच्छा दिल्या आहेत. “संजीवनमध्ये शिकलेली आमची विद्यार्थिनी आज राष्ट्रसेवेच्या उच्च शिखरावर पोहोचली आहे, याचा संपूर्ण विद्यालयाला सार्थ अभिमान आहे,” अशी भावना विद्यालय व्यवस्थापनाने व्यक्त केली.
संजीवन विद्यालयाची शैक्षणिक परंपरा नेहमीच विद्यार्थ्यांमध्ये केवळ पुस्तकी ज्ञान न रुजवता नेतृत्व, धैर्य आणि राष्ट्रप्रेमाचे मूल्य रुजवणारी राहिली आहे. अनन्याचा हा प्रवास संजीवनच्या शिरपेचात सुवर्णाक्षरांनी लिहिला जाणारा ठरला असून, तिच्या या यशामुळे पाचगणी परिसरातील इतर विद्यार्थ्यांना आणि विशेषतः विद्यार्थिनींना भारतीय लष्करात करिअर करण्यासाठी मोठी प्रेरणा मिळणार आहे.
