पांचगणी न्यूज नेटवर्क
पांचगणी, ता. 5 : दुर्गम व डोंगराळ भागातील खेळाडूंमध्ये असणारे मैदानी नैपुण्य आणि जिद्दीच्या जोरावर महाबळेश्वर येथील अंजुमन खैरुल इस्लाम उर्दू (सेमी इंग्लिश) हायस्कूलच्या संघाने तालुकास्तरीय शालेय कबड्डी स्पर्धेत देदीप्यमान यश संपादन केले आहे. १४ वर्षांखालील मुलांच्या गटात प्रतिस्पर्ध्यांवर मात करत या संघाने अजिंक्यपदाचा चषक उंचावला असून, त्यांच्या या कामगिरीमुळे संपूर्ण महाबळेश्वर तालुक्यातून कौतुकाचा वर्षाव होत आहे.
जिल्हा क्रीडा कार्यालय सातारा, महात्मा फुले हायस्कूल आणि कांताबेन मेहता कॉलेज पाचगणी यांच्या संयुक्त विद्यमाने कांताबेन मेहता कॉलेजच्या भव्य मैदानावर या तालुकास्तरीय शालेय कबड्डी स्पर्धेचे आयोजन करण्यात आले होते. तीन दिवस चाललेल्या या क्रीडा महोत्सवात तालुक्यातील विविध शाळांच्या बलाढ्य संघांनी सहभाग नोंदवला होता.
सुरवातीच्या साखळी सामन्यांपासूनच अंजुमन खैरुल इस्लाम हायस्कूलच्या बाल खेळाडूंनी आक्रमक चढाया आणि भक्कम पकडीचे प्रदर्शन करत मैदानावर आपले वर्चस्व निर्माण केले. उपांत्य आणि अंतिम सामन्यात खेळाडूंमधील उत्कृष्ट समन्वय, चपळता आणि सांघिक रणनीती अत्यंत प्रभावी ठरली. अंतिम लढतीत प्रतिस्पर्धी संघाला पुनरागमन करण्याची कोणतीही संधी न देता महाबळेश्वरच्या या बालचमूंनी दिमाखात विजेतेपदाला गवसणी घातली.
या यशामागे खेळाडूंचे अथक परिश्रम आणि शाळेचे योग्य नियोजन मोलाचे ठरले. शाळेच्या मुख्याध्यापिका सौ. शबाना असद इमरान शेख यांच्या प्रोत्साहनपर नेतृत्वाखाली व क्रीडा शिक्षक श्री. मुनसीफ मोहम्मद रफीक वारुणकर यांच्या शिस्तबद्ध, तंत्रशुद्ध मार्गदर्शनामुळे खेळाडूंनी ही उंच भरारी घेतली आहे. या यशाबद्दल शाळा व्यवस्थापन समिती, शिक्षकवृंद, पालक आणि क्रीडाप्रेमींनी विजेत्या खेळाडूंचे आणि मार्गदर्शकांचे विशेष अभिनंदन केले असून पुढील जिल्हास्तरीय स्पर्धेसाठी त्यांना शुभेच्छा दिल्या आहेत.
