पांचगणी न्यूज नेटवर्क
जग काय म्हणतंय याकडे दुर्लक्ष करत, केवळ आपल्या कष्टावर आणि प्रामाणिकपणावर विश्वास ठेवून यशाचे शिखर गाठणारे प्रेरणादायी व्यक्तिमत्व म्हणजे श्री. सचिन रांजणे. संस्थेचे संस्थापक आणि ‘मॅजिक फूड प्रॉडक्ट्स’चे संचालक असलेल्या सचिनजींचा आज वाढदिवस! त्यानिमित्ताने त्यांच्या या संघर्षमय आणि देदीप्यमान प्रवासाचा घेतलेला हा आढावा.
दापवडी गावचे रहिवासी हणमंत रांजणे यांनी अत्यंत गरिबीत दिवस काढत, ‘मालाज जाम जेली’ कंपनीत नोकरी करून आणि दुग्ध व्यवसायाची जोड देऊन कुटुंबाचा गाडा हाकला. वडीलधाऱ्यांचे हेच कष्टाचे संस्कार सचिन रांजणे यांच्या पाठीशी होते. शिक्षण पूर्ण झाल्यावर नोकरीची वाट बिकट दिसताच त्यांनी जिद्द सोडली नाही. त्यांनी पांचगणीतील जयंतीलाल कंपनीमध्ये सेल्समन म्हणून कामाला सुरुवात केली. पहिल्यापासूनच चळवळी स्वभाव, रोखठोकपणा आणि लाघवी व्यक्तिमत्व यामुळे त्यांनी मोठा लोकसंचय जोडला. मात्र, स्वतःचे काहीतरी वेगळे करण्याची तळमळ त्यांना स्वस्थ बसू देत नव्हती.
वडिलांच्या अनुभवाचा शिदोरीसारखा वापर करत त्यांनी स्वतःच्या घरातूनच जेली बनवण्याचा उद्योग सुरू केला. सचिनजींच्या स्वभावातील गोडवा आणि उत्पादनातील उत्तम गुणवत्ता यामुळे अल्पावधीतच ‘मॅजिक’ या ब्रँडने बाजारात आपली भक्कम ओळख निर्माण केली. आज त्यांच्या या उद्योगाने मोठी उत्तुंग भरारी घेतली असून, अनेक कुटुंबांना या माध्यमातून रोजगाराचा आणि सन्मानाचा आधार मिळाला आहे.
केवळ उद्योग व्यवसायापुरते मर्यादित न राहता त्यांनी सामाजिक कार्यातही स्वतःला झोकून दिले. शिवसेनेच्या माध्यमातून आदरणीय बाळासाहेब ठाकरे यांच्या विचारांचा वारसा जपत त्यांनी परिसरातील अनेक समस्या धसास लावल्या
त्याचबरोबर, सर्वसामान्य नागरिक व युवकांना आर्थिकदृष्ट्या सक्षम करण्यासाठी त्यांनी मुंबईत ‘साई पतसंस्थेची’ यशस्वी स्थापना केली. सहकार, सामाजिक सेवा आणि ग्रामीण विकास अशा प्रत्येक क्षेत्रात ते नेहमी अग्रभागी राहिले आहेत.
ग्रामीण भागातील प्रतिकूल परिस्थितीवर मात करत, शून्यातून विश्व निर्माण करणारे हे युवा नेतृत्व आज अनेक तरुण उद्योजकांसाठी प्रेरणास्थान ठरत आहे.
उद्योजक श्री. सचिन रांजणे यांना वाढदिवसाच्या हार्दिक शुभेच्छा!
