पांचगणी न्यूज नेटवर्क
पांचगणी : ग्रामीण आणि स्थानिक भागातील नागरिकांना उत्तम आरोग्य सुविधा मिळाव्यात तसेच मोफत नेत्र तपासणी व निदानाद्वारे नागरिकांचे जीवन प्रकाशमय व्हावे, या सामाजिक उद्देशाने पांचगणी येथे आयोजित करण्यात आलेल्या मोफत नेत्र तपासणी शिबिराला नागरिकांचा उत्स्फूर्त प्रतिसाद मिळाला. इनर व्हील क्लब ऑफ पांचगणी, रोटरी क्लब, रोटरॅक्ट क्लब आणि गोपाळ कृष्ण नेत्र चिकित्सालय यांच्या संयुक्त विद्यमाने बेबी पॉईंट जवळील पांचगणी क्लब येथे या शिबिराचे यशस्वी आयोजन करण्यात आले.
”निरोगी डोळे, आनंदी जीवन” हे ब्रीदवाक्य समोर ठेवून आयोजित केलेल्या या शिबिरात पांचगणी शहर व आसपासच्या ग्रामीण भागातील शेकडो लाभार्थ्यांची तज्ज्ञ डॉक्टरांच्या टीमद्वारे मोफत नेत्र तपासणी करण्यात आली. दृष्टीदोष आढळलेल्या व गरजू रुग्णांना मोफत चष्म्यांचे वाटप करण्यात आले, तर गंभीर आजार असणाऱ्या रुग्णांना पुढील उपचारांसाठी तज्ज्ञांकडून मार्गदर्शन करण्यात आले. वयोवृद्ध नागरिकांसह अनेक गरजू बांधवांनी या संधीचा लाभ घेतला.
समाजातील शेवटच्या घटकापर्यंत वैद्यकीय सेवा पोहोचवण्यासाठी इनर व्हील, रोटरी आणि रोटरॅक्ट या तिन्ही सामाजिक संस्थांनी एकत्र येत सेवाभावाचे एक उत्तम उदाहरण निर्माण केले आहे. या उपक्रमामुळे अनेक नागरिकांना वेळेवर नेत्र तपासणीची सुविधा उपलब्ध झाली असून, नेत्र आरोग्याबाबत मोठी जनजागृती होण्यास मदत झाली आहे.
हे शिबिर यशस्वी करण्यासाठी इनर व्हील क्लब ऑफ पांचगणीच्या अध्यक्षा श्वेता बोधे, सचिव स्नेहा होळकर, सीमा समेळ यांच्यासह तिन्ही संस्थांच्या सर्व पदाधिकाऱ्यांनी व सदस्यांनी विशेष परिश्रम घेतले. या सामाजिक उपक्रमाचे पांचगणी व परिसरातील नागरिकांमधून विशेष कौतुक होत आहे.
