पांचगणी न्यूज नेटवर्क
पांचगणी : भारताचे पहिले कायदामंत्री आणि घटनेचे शिल्पकार भारतरत्न डॉ. बाबासाहेब आंबेडकर यांच्या शालेय प्रवेश दिनाचे औचित्य साधून शिक्षण विभाग, पंचायत समिती महाबळेश्वर यांच्या संयुक्त विद्यमाने आयोजित तालुकास्तरीय वक्तृत्व व निबंध स्पर्धेत जिल्हा परिषद प्राथमिक शाळा भोसेच्या विद्यार्थिनींनी आपल्या अष्टपैलू गुणवत्तेच्या जोरावर दणदणीत यश संपादन केले आहे. ७ नोव्हेंबर ‘विद्यार्थी प्रवेश दिना’चे औचित्य साधून आयोजित या स्पर्धांमध्ये भोसे शाळेच्या विद्यार्थिनींनी प्रथम व द्वितीय क्रमांकावर आपले नाव कोरत शाळेचा आणि भोसे गावाचा नावलौकिक उंचावला आहे.
तालुका पातळीवर आयोजित केलेल्या वक्तृत्व स्पर्धेतील मोठ्या गटात भोसे शाळेच्या शुभ्रा रामचंद्र गोळे हिने आपल्या ओघवत्या आणि प्रभावशाली वक्तृत्वाने प्रथम क्रमांक पटकावून सुवर्ण यश मिळवले. याच स्पर्धेत आपल्या अभ्यासपूर्ण विचारांची मांडणी करत आराध्या किरण टिके हिने द्वितीय क्रमांक मिळवत यश संपादन केले. याशिवाय, अत्यंत चुरशीच्या ठरलेल्या निबंध स्पर्धेत ईश्वरी सागर गोळे हिने आपल्या सुंदर लेखनशैली आणि प्रभावी विचारसौंदर्याच्या बळावर प्रथम क्रमांक पटकावून शाळेच्या यशाची पताका अधिक उंच फडकावली. एकाच वेळी दोन्ही स्पर्धांमध्ये चमकदार कामगिरी करत भोसे शाळेच्या या तिनही कन्यांनी तालुका पातळीवर आपल्या गुणवत्तेचा ठसा उमटवला आहे.
डॉ. बाबासाहेब आंबेडकरांनी ७ नोव्हेंबर १९०० रोजी सातारच्या प्रतापसिंह हायस्कूलमध्ये प्रवेश घेतला होता. हा दिवस राज्यभरात ‘विद्यार्थी प्रवेश दिन’ म्हणून साजरा केला जातो. विद्यार्थ्यांमध्ये अभ्यासासोबतच वक्तृत्व, चिंतन व लेखन कौशल्याचा विकास व्हावा, या उद्देशाने पंचायत समिती महाबळेश्वरच्या शिक्षण विभागाने या विविध स्पर्धांचे आयोजन केले होते. या स्पर्धेतील भोसे शाळेच्या यशाबद्दल सर्वत्र कौतुक होत असून, यशस्वी विद्यार्थिनींवर अभिनंदनाचा वर्षाव होत आहे.
विद्यार्थिनींच्या या दैदिप्यमान यशाबद्दल शाळा व्यवस्थापन समितीचे अध्यक्ष श्री. राम गोळे, उपाध्यक्ष श्री. सागर गोळे, मुख्याध्यापिका सौ. सुजाता ढेबे, मार्गदर्शक शिक्षक श्री. आनंदा पारठे, श्री. अमित कारंडे, सौ. अर्चना बगाडे, सौ. कविता नेवसे, श्री. उस्मान तांबोळी, सर्व शाळा व्यवस्थापन समिती सदस्य तसेच भोसे ग्रामस्थ मंडळाच्या वतीने विजेत्या विद्यार्थिनींचे विशेष अभिनंदन करण्यात आले. या यशात शाळेतील शिक्षकांचे योग्य मार्गदर्शन आणि विद्यार्थ्यांची जिद्द मोलाची ठरल्याची भावना याप्रसंगी व्यक्त करण्यात आली.
