पांचगणी न्यूज नेटवर्क
महाबळेश्वर: महाराष्ट्राच्या ग्रामीण भागाचा कायापालट करण्यासाठी आणि गावपातळीवरील प्रशासनाला आधुनिकतेची जोड देत अधिक लोकाभिमुख बनवण्यासाठी ग्रामविकास व पंचायत राज विभागाच्या वतीने महाबळेश्वरच्या निसर्गरम्य वातावरणात तीन दिवसीय राज्यस्तरीय कार्यशाळेचा शानदार शुभारंभ झाला. येथील एव्हरशाईन रिसॉर्टमध्ये आयोजित या अत्यंत महत्त्वाच्या कार्यशाळेचे उद्घाटन राज्याचे ग्रामविकास मंत्री ना. जयकुमार गोरे यांच्या प्रमुख उपस्थितीत मोठ्या उत्साहात पार पडले. १० ते १२ सप्टेंबरदरम्यान चालणाऱ्या या राज्यस्तरीय मंथनातून ग्रामीण महाराष्ट्राच्या विकासाला एक नवी आणि गतिमान दिशा मिळण्याची भक्कम पायाभरणी केली जात आहे.
कार्यशाळेच्या पहिल्या दिवशी सकाळच्या सत्रात देशभक्तीपूर्ण वंदे मातरम्‌ने वातावरणात चैतन्य निर्माण झाले. सातारा जिल्हा परिषदेच्या मुख्य कार्यकारी अधिकाऱ्यांनी उपस्थित सर्व मान्यवरांचे आदरपूर्वक स्वागत केले. यानंतर ग्रामविकास विभागाचे सचिव डॉ. चंद्रकांत पुलकुंडवार यांनी प्रास्ताविक करताना या कार्यशाळेची पार्श्वभूमी, उद्दिष्टे आणि आगामी काळातील ग्रामीण विकासाचा मार्ग स्पष्ट केला. राज्यभरात राबविल्या जाणाऱ्या ‘मुख्यमंत्री समृद्ध पंचायत राज अभियाना’ची प्रभावी अंमलबजावणी, त्यासमोरील आव्हाने आणि या आव्हानांवर मात करण्यासाठी आखायच्या उपाययोजनांवर पहिल्याच दिवशी सखोल सादरीकरण करण्यात आले.
या कार्यशाळेत केवळ शासकीय धोरणांवर चर्चा न होता, प्रत्यक्ष मैदानी पातळीवरील अनुभवांची जोड देण्यात आली. अभियानाच्या आठ प्रमुख घटकांवर राज्यभरातून आलेल्या वरिष्ठ अधिकाऱ्यांच्या विविध गटांमध्ये सविस्तर गटचर्चा झाली. यामध्ये ग्रामपंचायत स्तरावर येणाऱ्या व्यावहारिक अडचणी, विविध योजनांमधील समन्वय आणि ते सोडवण्यासाठी स्थानिक पातळीवर केलेले यशस्वी प्रयोग यावर अधिकाऱ्यांनी मुक्तपणे अनुभवकथन केले. दुपारच्या सत्रात मंत्री महोदयांनी उपस्थित सनदी अधिकारी, मुख्य कार्यकारी अधिकारी आणि इतर उपस्थितांना मार्गदर्शन करत, शासकीय योजनांचा लाभ शेवटच्या घटकापर्यंत विनाविलंब कसा पोहोचवता येईल यासाठी प्रशासनाने अधिक आक्रमक व लोकाभिमुख काम करण्याचे आवाहन केले.
या महत्त्वाच्या कार्यशाळेस RGSA चे संचालक गिरीष भालेराव, ‘यशदा’ पुणेचे उपमहासंचालक मल्लिनाथ कलशेट्टी, ‘उमेद’चे मुख्य कार्यकारी अधिकारी श्रीधर डुबे पाटील आणि राज्य व्यवस्थापक (ग्रामीण गृहनिर्माण) राजाराम दिघे यांच्यासह राज्यातील सर्व जिल्हा परिषदांचे मुख्य कार्यकारी अधिकारी, अपर आयुक्त आणि उपमुख्य कार्यकारी अधिकारी मोठ्या संख्येने उपस्थित आहेत.
उद्या ‘आवास’ व ‘उमेद’वर निर्णायक चर्चा
कार्यशाळेच्या अंतिम दिवशी, म्हणजेच १२ सप्टेंबर रोजी ग्रामीण भागाचे अर्थकारण बदलणाऱ्या ‘प्रधानमंत्री आवास योजना-ग्रामीण’ आणि ‘महाराष्ट्र राज्य ग्रामीण जीवनोन्नती अभियान’ (उमेद) या दोन अतिशय महत्त्वाच्या विषयांवर विशेष सत्रे पार पडणार आहेत. याशिवाय मुख्यमंत्री कार्यालयाचे सादरीकरण, आगामी ‘सेवा पंधरवडा’चे नियोजन आणि जिल्हा परिषदांचे काम डिजिटल व सुटसुटीत करणाऱ्या ‘ई-झेडपी’ (e-ZP) ॲपबाबतही सविस्तर मार्गदर्शन केले जाणार आहे. महाबळेश्वरच्या गारव्यात पार पडणारे हे मंथन आगामी काळात महाराष्ट्रातील ग्रामपंचायतींना अधिक सक्षम, समृद्ध आणि स्वावलंबी बनवण्यासाठी नक्कीच दिशादर्शक ठरेल, असा विश्वास व्यक्त केला जात आहे.
