पाचगणी न्यूज नेटवर्क
पांचगणी : खेळातील अचूक निर्णयक्षमता, संयमी खेळ आणि उत्कृष्ट बुद्धीचातुर्याच्या जोरावर पाचगणी येथील नामांकित सेंट जोसेफ कॉन्व्हेंट स्कूलची विद्यार्थिनी स्वरा सचिन मालुसरे हिने तालुकास्तरीय बुद्धिबळ स्पर्धेत प्रथम क्रमांक पटकावून घवघवीत यश संपादन केले आहे. १७ वर्षांखालील मुलींच्या गटात मिळवलेल्या या अभूतपूर्व यशामुळे स्वराची जिल्हास्तरीय बुद्धिबळ स्पर्धेसाठी निवड झाली असून, तिच्या या कामगिरीमुळे संपूर्ण पाचगणी परिसरात कौतुकाचा वर्षाव होत आहे.
शालेय क्रीडा व युवक सेवा संचालनालय तसेच तालुका क्रीडा अधिकारी कार्यालयांच्या संयुक्त विद्यमाने सेंट जोसेफ कॉन्व्हेंट स्कूल, पाचगणी येथे तालुकास्तरीय बुद्धिबळ स्पर्धेचे भव्य आयोजन करण्यात आले होते. या स्पर्धेत महाबळेश्वर तालुक्यातील विविध शाळांमधील गुणवंत खेळाडूंनी मोठ्या संख्येने सहभाग नोंदवला होता.
१७ वर्षांखालील मुलींच्या गटात स्वरा मालुसरे हिने सुरुवातीच्या पहिल्या डावापासूनच अत्यंत आक्रमक आणि कौशल्याने चाली रचत प्रतिस्पर्ध्यांवर वर्चस्व निर्माण केले. अत्यंत चुरशीच्या ठरलेल्या अंतिम फेरीत स्वराने आपल्या अचूक रणनीतीच्या बळावर प्रतिस्पर्धी खेळाडूला मात देत विजेतेपदावर आपले नाव कोरले.
विद्यार्थ्यांच्या केवळ शैक्षणिकच नव्हे, तर सर्वांगीण विकासासाठी आणि त्यांच्यातील क्रीडागुणांना वाव देण्यासाठी सेंट जोसेफ कॉन्व्हेंट स्कूलकडून नेहमीच विविध उपक्रम राबवले जातात. स्वराच्या या यशामुळे शाळेच्या शिरपेचात आणखी एक मानाचा तुरा रोवला गेला आहे.
स्वराच्या या विशेष यशाबद्दल सेंट जोसेफ कॉन्व्हेंट स्कूलच्या प्राचार्या, ॲडमिनिस्ट्रेटर, तिला मोलाचे मार्गदर्शन करणारे क्रीडा शिक्षक आणि सर्व शिक्षकवृंदाने तिचे विशेष कौतुक केले. तालुक्यात मिळवलेल्या या यशाच्या जोरावर आगामी जिल्हा आणि राज्यस्तरीय स्पर्धेतही तिने अशीच दैदिप्यमान कामगिरी करून शाळा व परिसराचे नाव उज्ज्वल करावे, अशा शब्दांत तिला पुढील क्रीडा प्रवासासाठी शुभेच्छा देण्यात आल्या. स्वराच्या या चमकदार कामगिरीबद्दल पाचगणी शहरासह गोडवली गावातून व संपूर्ण परिसरातून तिच्यावर अभिनंदनाचा वर्षाव होत आहे.
