पांचगणी न्यूज नेटवर्क
पांचगणी, दि. ११ : महाबळेश्वर तालुका क्रीडा अधिकारी कार्यालय आणि एस. एम. बाथा हायस्कूल यांच्या संयुक्त विद्यमाने आयोजित तालुकास्तरीय शालेय कुस्ती स्पर्धेत पांचगणी येथील नचिकेतास हायस्कूल अँड ज्युनियर कॉलेज आणि अ‍ॅस्टॉन हॉस्टेलच्या पैलवानांनी विजयाचा धडाका लावत घवघवीत यश मिळवले. विविध वयोगट व वजन गटात आक्रमक डावपेच आणि तांत्रिक गुणांच्या जोरावर प्रतिस्पर्ध्यांवर मात करत या खेळाडूंनी प्रथमांक पटकावला असून, त्यांची जिल्हास्तरीय कुस्ती स्पर्धेसाठी निवड झाली आहे.
पांचगणी येथील बाथा हायस्कूलच्या इनडोअर हॉलमध्ये ही स्पर्धा पार पडली. तालुक्यातील विविध शाळांमधील मल्लांनी या स्पर्धेत सहभाग घेतला होता. अत्यंत चुरशीच्या झालेल्या या लढतींमध्ये नचिकेतास हायस्कूल आणि अ‍ॅस्टॉन हॉस्टेलच्या मल्लांनी सुरुवातीपासूनच वर्चस्व राखले. मुलींच्या १७ वर्षांखालील ६५ किलो वजन गटात कुमारी छवी नरपत सूथार हिने उत्कृष्ट पकड आणि चपळाई दाखवत प्रथम क्रमांक पटकावला. तर १९ वर्षांखालील ७५ किलो वजन गटात कुमारी झलक राजेंद्र जैस्वाल हिने प्रतिस्पर्धी मल्लास धूळ चारत अव्वल स्थान मिळवले.
मुलांच्या विभागामध्येही नचिकेतासच्या मल्लांनी आपला दबदबा कायम ठेवला. १७ वर्षांखालील ९५ किलो वजन गटात कुमार मल्हार संजय खिलारे याने आपल्या ताकदीच्या जोरावर बाजी मारली. १९ वर्षांखालील गटात ८५ किलो वजनी गटातून कुमार श्रेयस संतोष शेळके तर ९५ किलो वजनी गटातून कुमार दिशांक विवेक शिंदे यांनी प्रतिस्पर्ध्यांवर आक्रमक डावांची पकड घट्ट करत प्रथम क्रमांक पटकावून आपल्या शाळेचा झेंडा फडकावला.
या सर्व यशस्वी खेळाडूंना शाळेचे क्रीडा शिक्षक व प्रशिक्षक मनोज पवार, अमोल कांबळे आणि अ‍ॅस्टॉन हॉस्टेलच्या मार्गदर्शकांचे मोलाचे मार्गदर्शन लाभले. लाल मातीतील कौशल्याची आणि आधुनिक कुस्तीच्या तंत्राची योग्य सांगड घातल्यामुळेच विद्यार्थ्यांनी हे घवघवीत यश संपादन केले.
खेळाडूंच्या या दैदिप्यमान यशाबद्दल नचिकेतास संस्थेचे संस्थापक नरेंद्र बिरामणे, अमर बिरामणे, शाळेचे प्राचार्य प्रकाश बेलोशे, अ‍ॅस्टॉन हॉस्टेलचे व्यवस्थापन व परिसरातील क्रीडाप्रेमी नागरिकांनी सर्व विजेत्या मल्लांचे आणि त्यांच्या प्रशिक्षकांचे विशेष कौतुक केले. आगामी जिल्हास्तरीय कुस्ती स्पर्धेतही हीच विजयाची परंपरा कायम राहील, असा विश्वास व्यक्त करत सर्व खेळाडूंना पुढील प्रवासासाठी हार्दिक शुभेच्छा देण्यात आल्या.
