पांचगणी न्यूज नेटवर्क
पांचगणी : सभासदांचे हित केंद्रस्थानी ठेवून आखलेली धोरणे, कडक आर्थिक शिस्त, वेळेवर कर्जवसुली आणि अत्यंत पारदर्शक कारभाराच्या जोरावर महाबळेश्वर तालुका माध्यमिक शिक्षक व शिक्षकेतर कर्मचारी सहकारी पतसंस्थेने सहकार क्षेत्रात आपला वेगळा ठसा उमटवला आहे. गेल्या सलग पाच वर्षांपासून संस्थेने लेखापरीक्षणात ‘अ’ वर्ग पटकावून आपली आर्थिक वाटचाल कमालीची भक्कम असल्याचे सिद्ध केले असून, संस्थेच्या या उल्लेखनीय कामगिरीमुळे सभासदांचा विश्वास अधिक दृढ झाला आहे.
संस्थेची वार्षिक सर्वसाधारण सभा अत्यंत उत्साही आणि सकारात्मक वातावरणात पार पडली. यावेळी व्यासपीठावर संस्थेचे संस्थापक चंद्रकांत पाडळे, चेअरमन शिवाजीराव जाधव, उपाध्यक्ष नितीन प्रभाळे, सचिव डॉ. तुषार आखाडे, कर्ज अधीक्षक अजित राजपुरे, संचालक विनायक बगाडे, संजय शिंदे, शशिकांत विचारे, चिन्मय गाडेकर यांच्यासह संपूर्ण संचालक मंडळ, शाखा प्रमुख निलम चौरसिया आणि मुख्य मार्गदर्शक अशोक साबळे प्रमुख उपस्थित होते.
सभेच्या प्रारंभी सचिव डॉ. तुषार आखाडे यांनी प्रास्ताविक करताना संस्थेच्या वाटचालीचा संक्षिप्त पट मांडला. त्यानंतर अध्यक्षीय भाषणात चेअरमन शिवाजीराव जाधव यांनी गेल्या पाच वर्षांतील संस्थेच्या आर्थिक व प्रशासकीय प्रगतीचा सविस्तर आढावा घेतला. सभासदांचे कल्याण, ठेवींची सुरक्षितता आणि संस्थेचा विस्तार यासाठी नजीकच्या भविष्यात विविध नावीन्यपूर्ण व आधुनिक कल्याणकारी उपक्रम राबवण्याचा निर्धार त्यांनी व्यक्त केला.
संस्थेचे मुख्य मार्गदर्शक व लेखापरीक्षक अशोक साबळे यांनी ताळेबंद, नफा-तोटा पत्रक आणि आर्थिक स्थिरतेचा लेखाजोखा उपस्थितांसमोर मांडला. संस्थेला सलग ‘अ’ दर्जा मिळण्यामागे संचालक मंडळाचे सूक्ष्म नियोजन आणि कर्मचाऱ्यांची तत्परता कारणीभूत असल्याचे सांगत त्यांनी भविष्यातील आर्थिक गुंतवणुकीबाबत महत्त्वपूर्ण मार्गदर्शन केले.
सभेत विषयपत्रिकेवरील सर्व मुद्द्यांवर सभासदांनी सकारात्मक चर्चा करत सर्व ठराव एकमताने मंजूर केले. या सोहळ्यात उत्कृष्ट मार्गदर्शनाबद्दल अशोक साबळे व डॉ. तुषार आखाडे यांचा चेअरमन शिवाजीराव जाधव व उपाध्यक्ष नितीन प्रभाळे यांच्या हस्ते विशेष सन्मान करण्यात आला. शेवटी उपाध्यक्ष नितीन प्रभाळे यांनी उपस्थितांचे आभार मानले.
