पांचगणी न्यूज नेटवर्क
पाचगणी : आपण ज्या मातीत लहानाचे मोठे झालो आणि ज्या शाळेने आपल्याला आयुष्याची दिशा दिली, तिच्याप्रती कृतज्ञता व्यक्त करणे हे प्रत्येक यशस्वी व्यक्तीचे कर्तव्य असते. हाच आदर्श डोळ्यांसमोर ठेवत, पीएमश्री शाळा गोडवलीचे माजी विद्यार्थी आणि ‘स्पोर्टिका फिटनेस’ (वाई) चे संस्थापक युवा उद्योजक श्री. संजय चंद्रकांत मालुसरे यांनी आपल्या औदार्याने गावातील बालकांचे चेहरे उजळवून टाकले. आपला मुलगा कु. दक्षिल याच्या वाढदिवसाच्या निमित्ताने त्यांनी शाळेतील सर्व ३९ विद्यार्थ्यांना आकर्षक स्पोर्ट्स ड्रेसचे वाटप करून एक नवा आदर्श घालून दिला आहे.
बुधवार, ३० सप्टेंबर रोजी पीएमश्री शाळा गोडवलीच्या प्रांगणात हा आनंददायी कार्यक्रम संपन्न झाला. कुठलाही निरर्थक थाटमाट न करता, मुलाच्या वाढदिवसाचे औचित्य साधून सामाजिक उपयुक्ततेचा मार्ग निवडणाऱ्या मालुसरे दांपत्याच्या या निर्णयाचे सर्वत्र कौतुक होत आहे. क्रीडा क्षेत्राला वाहिलेल्या व्यवसायाशी जोडलेले असल्याने, मुलांमध्ये खेळाची आवड आणि शिस्त निर्माण व्हावी या हेतूनेच त्यांनी क्रीडा गणवेशांची ही भेट निवडली.
कार्यक्रमाचे अध्यक्ष आणि गोडवली गावचे सरपंच मा. विष्णू (आप्पा) मालुसरे यांनी आपल्या भाषणात सांगितले की, “आजच्या काळात वाढदिवसावर अनाठायी खर्च करण्याऐवजी आपल्याच जन्मभूमीतील विद्यार्थ्यांच्या पाठीवर कौतुकाची थाप मारणे, ही फार मोठी गोष्ट आहे. संजय मालुसरे यांच्या या उपक्रमामुळे ग्रामीण भागातील लहानग्यांमध्ये खेळाप्रती नवा उत्साह निर्माण होईल.”
याप्रसंगी शाळा व्यवस्थापन समितीच्या अध्यक्षा सौ. विद्या मालुसरे, उपाध्यक्ष श्री. मंगेश पवार, सौ. अनिता बिरामणे, तसेच गावातील इतर मान्यवर व पालक वर्ग मोठ्या संख्येने उपस्थित होता.
शिक्षण क्षेत्रातील या विधायक योगदानाबद्दल महाबळेश्वरचे गटशिक्षणाधिकारी श्री. प्रतीक कडू साहेब, केंद्रप्रमुख श्री. प्रदीप दाभाडे आणि श्री. संजय पारठे यांनी संजय मालुसरे आणि त्यांच्या परिवाराचे मनःपूर्वक अभिनंदन केले. शाळा प्रशासन, शाळा व्यवस्थापन समिती व गोडवली ग्रामस्थांनी मालुसरे दांपत्याप्रती विशेष कृतज्ञता व्यक्त केली.
कार्यक्रमाचे नेटके सूत्रसंचालन मुख्याध्यापक श्री. मनोहर गायकवाड सर यांनी केले, तर उपस्थितांचे आभार श्रीम. वैशाली जाधव मॅडम यांनी मानले. या उपक्रमामुळे संपूर्ण गोडवली गावात उत्साहाचे आणि कौतुकाचे वातावरण पाहायला मिळाले.
