पांचगणी न्यूज नेटवर्क
पांचगणी : सातारा जिल्हा मध्यवर्ती सहकारी बँकेच्या निवडणुकीत अत्यंत प्रतिष्ठेच्या ठरलेल्या महाबळेश्वर सोसायटी मतदारसंघाचे सर्व चित्र आता पूर्णपणे स्पष्ट झाले आहे. कायदेशीर काय आणि राजकीय घडामोडींचे सर्व टप्पे पार पडल्यानंतर, अर्ज मागे घेण्याच्या अखेरच्या क्षणापर्यंत दोन्ही बाजूंपैकी कोणीही माघार घेतलेली नाही. परिणामी, महाबळेश्वरच्या सहकार क्षेत्रावर वर्चस्व प्रस्थापित करण्यासाठी आता रुपाली राजेंद्र राजपुरे आणि संजय हरिश्चंद्र मोरे यांच्यामध्ये थेट आणि अटीतटीची दुरंगी लढत रंगणार आहे.
गेल्या काही दिवसांपासून या मतदारसंघातील निवडणुकीबाबत वेगवेगळ्या चर्चांना उधाण आले होते. महाबळेश्वर तालुक्यातील प्राथमिक कृषी पुरवठा विकास संस्थेच्या प्रतिनिधी पदासाठी रुपाली राजपुरे यांनी उमेदवारी अर्ज दाखल केला होता, तर त्यांच्या विरोधात संजय मोरे यांनीही आपले तगडे आव्हान उभे केले होते. दोन्ही नेत्यांनी आपली ताकद पणाला लावल्यामुळे या मतदारसंघात निवडणूक बिनविरोध होणार की चुरशीची होणार, याबाबत मोठी उत्सुकता निर्माण झाली होती. अखेर माघारीची मुदत संपली आणि कोणत्याही बाजूने माघार न झाल्याने निवडणुकीचा हा सामना आता थेट मैदानात उतरला आहे.
या प्रतिष्ठेच्या लढतीत आता दोन्ही उमेदवार आपले राजकीय कसब पणाला लावून प्रचारात उतरले आहेत. तालुक्यातील सोसायटीच्या प्रत्येक मतावर लक्ष केंद्रित करत मतदारांना आपल्या बाजूने वळवण्यासाठी जोरदार मोर्चेबांधणी सुरू झाली आहे. महाबळेश्वरच्या या हायव्होल्टेज दुरंगी लढतीत अखेर बाजी कोण मारणार आणि सहकाराचा हा गड कोण सर करणार, याकडे आता संपूर्ण सातारा जिल्ह्याचे लक्ष लागून राहिले आहे.
