पांचगणी न्यूज नेटवर्क
पाचगणी : पर्यटननगरी पाचगणी व परिसरात एकच खळबळ उडवून देणारी घटना समोर आली आहे. मुंबईतील एका बड्या व्यावसायिकाला आंतरराष्ट्रीय क्रमांकावरून आलेल्या धमकीच्या प्रकरणाचा छडा लावताना, पाचगणीजवळील गोडवली गावातून ‘लष्कर-ए-तोयबा’ या दहशतवादी संघटनेशी संशयित संबंध असलेल्या एका व्यक्तीला मुंबई गुन्हे शाखेच्या गुन्हे गुप्तचर पथकाने (सीआययू) गुरुवारी नाट्यमयरित्या ताब्यात घेतले. मोहम्मद शफीक मोहम्मद अकबर लोन (वय ३९, मूळ रा. जम्मू-काश्मीर, सध्या रा. गोडवली, ता. महाबळेश्वर) असे अटक करण्यात आलेल्या संशयिताचे नाव आहे.
मुंबईतील वांद्रे (पूर्व) परिसरातील एका अनधिकृत मशिदीच्या पाडकामाबाबत प्रशासनाला पाठिंबा दिल्याचा राग मनात धरून, प्रसिद्ध व्यावसायिक इम्तियाज खत्री यांना २१ मेपासून आंतरराष्ट्रीय व्हॉट्सॲप क्रमांकांवरून सातत्याने धमक्या येत होत्या. याबाबत खत्री यांनी २२ जून रोजी पोलिसांत रीतसर तक्रार दाखल केली होती. या गंभीर प्रकरणाचा तपास करत असताना मुंबई गुन्हे शाखेला तांत्रिक विश्लेषणावरून पाचगणीतील गोडवली येथील धागेधोरे सापडले.
तपासादरम्यान अत्यंत धक्कादायक माहिती समोर आली आहे. संशयित शफीक लोन याचे वडील आणि दोन मोठे भाऊ पाकिस्तानव्याप्त काश्मीरमधील मुझफ्फराबाद येथे राहत असल्याचे निष्पन्न झाले आहे. यातील त्याचा एक भाऊ २०१९ मध्ये पाकिस्तानात गेला असून तो सध्या ‘लष्कर-ए-तोयबा’ या बंदी घातलेल्या दहशतवादी संघटनेत कमांडर पदावर कार्यरत आहे. तसेच शफीक हा पाकिस्तानातील ‘फैयाज काश्मिरी’ नावाच्या व्यक्तीच्या थेट संपर्कात असल्याचे सामाजिक माध्यमांवरील संवादावरून उघडकीस आले आहे. व्यावसायिकाला आलेले धमकीचे संदेश आणि फोन कॉल हे शफीकच्या मोबाईलशी थेट जोडलेले असल्याचे सबळ पुरावे तपास यंत्रणांच्या हाती लागले आहेत.
गेल्या काही काळापासून शफीक लोन हा पाचगणी पोलीस ठाण्याच्या हद्दीतील गोडवली येथील ‘रॉयल पॅलेस’ या खाजगी बंगल्यात केअरटेकर/कामगार म्हणून काम करत होता. शांत व निसर्गरम्य म्हणून ओळखल्या जाणाऱ्या पाचगणी परिसराचा आसरा घेऊन तो आपल्या संशयित कारवाया चालवत असल्याचा संशय आहे. गुरुवारी मुंबई गुन्हे गुप्तचर पथकाने अचानक छापा टाकून त्याला राहत्या ठिकाणाहून ताब्यात घेतले. त्याच्या ताब्यातून दोन महागडे मोबाईल आणि एक महत्त्वाकांक्षी डायरी जप्त करण्यात आली असल्याचे समजत आहे. मोबाईलमधील हटवलेला (डिलिट केलेला) मजकूर आणि डिजिटल डेटा पुनर्प्राप्त करण्यासाठी न्यायवैद्यक (फॉरेन्सिक) व तांत्रिक तज्ज्ञांची मदत घेतली जात आहे.
शांतताप्रिय आणि पर्यटनासाठी प्रसिद्ध असलेल्या महाबळेश्वर-पाचगणी परिसरात आंतरराष्ट्रीय दहशतवादी संघटनेशी संबंधित धागेधोरे सापडल्याने संपूर्ण सातारा जिल्ह्यात आणि पोलीस वर्तुळात प्रचंड खळबळ उडाली आहे. संशयित शफीकला पुढील सखोल चौकशीसाठी आणि देशविरोधी नेटवर्कचा पर्दाफाश करण्यासाठी मुंबईला नेण्यात आले आहे. या प्रकरणाचे मूळ किती खोलवर पसरले आहे आणि यात आणखी कोणाचा सहभाग आहे का, याचा कसून तपास सुरू आहे.
