पांचगणी न्यूज नेटवर्क
भिलार : मराठी भाषेला मिळालेला अभिजात दर्जा आणि तिच्या समृद्ध सांस्कृतिक-वैचारिक वारशाचा गौरव करण्यासाठी ‘पुस्तकांचे गाव’ म्हणून ओळखल्या जाणाऱ्या भिल्लारमध्ये एक विशेष सांस्कृतिक सोहळा रंगणार आहे. अभिजात मराठी भाषा दिनाचे औचित्य साधून राज्य मराठी विकास संस्थेच्या वतीने शनिवार, दिनांक ३ ऑक्टोबर २०२६ रोजी सायंकाळी ७ वाजता भिल्लार येथील हनुमान मंदिर सभागृहात ‘मराठीचे अद्वैतरंग’ या संगीतमय व नाट्यमय सांस्कृतिक कार्यक्रमाचे बहारदार आयोजन करण्यात आले आहे. हा कार्यक्रम सर्व भाषाप्रेमी व रसिकांसाठी पूर्णपणे विनामूल्य व खुला राहणार आहे.
मराठी भाषेचा अभिजात वैभवशाली इतिहास, समृद्ध संतसाहित्य, नादमधुर अभंग, शास्त्रीय संगीत, नयनमनोहारी कथ्थक नृत्य आणि जिवंत अभिनय यांचा अप्रतिम मिलाफ या कार्यक्रमाच्या माध्यमातून प्रेक्षकांना अनुभवायला मिळणार आहे. या विशेष नाट्यप्रयोगात पंढरीच्या वारीची शेकडो वर्षांची परंपरा, वारकरी संप्रदायाचा उत्कट भक्तिभाव आणि संतांनी जगाला दिलेली माणुसकी, समता व नैतिक मूल्यांची शिकवण यांवर प्रकाश टाकला जाणार आहे. एका वयोवृद्ध निष्ठावंत वारकरी आणि आजच्या आधुनिक तरुण पिढीतील प्रतिनिधी यांच्यातील अत्यंत प्रगल्भ संवादातून दोन पिढ्यांमधील नातेसंबंध, विचारांची देवाणघेवाण आणि वारीचे गूढ आध्यात्मिक महत्त्व या नाटकातून उलगडत जाणार आहे.
या कलाविष्काराचे लेखन राजीव मुळे यांनी केले असून, दिग्दर्शन व अभिनय सौरभ भिसे यांचा आहे. या रंगमंचीय सोहळ्यात शास्त्रीय गायक वैभव फडतरे, तबलावादक मिलिंद देवरे, हार्मोनियम वादक अमित जगदाळे व तुषार क्षीरसागर, टाळवादक किरण सावंत, नृत्यदिग्दर्शिका मानसी सदामते, अभिनेते निरंजन जोशी आणि बालकलाकार कल्याण कुलकर्णी या गुणी कलाकारांचा सहभाग असणार आहे. तसेच निनाद जगदाळे, ऐश्वर्या पलंगे, नमिता भिडे, ऐश्वर्या सरनाईक, मानसी चव्हाण व मुकुला पतकी हे कसलेले नृत्यकलाकार आपल्या नृत्यातून या सादरीकरणाला नवी उंची मिळवून देतील.
राज्य मराठी विकास संस्थेचे संचालक डॉ. शामकांत देवरे यांनी या कार्यक्रमाची सविस्तर माहिती दिली असून, “मराठी भाषेचा अभिजात सोहळा आणि आपल्या समृद्ध संतपरंपरेचा अनमोल सांस्कृतिक वारसा प्रत्यक्ष अनुभवण्यासाठी परिसरातील सर्व रसिक-प्रेक्षकांनी, अभ्यासकांनी व नागरिकांनी या कार्यक्रमाला मोठ्या संख्येने उपस्थित राहावे,” असे आग्रहाचे आवाहन आयोजकांच्या वतीने करण्यात आले आहे.
