पांचगणी न्यूज नेटवर्क
भिलार (प्रतिनिधी): ग्रामीण अर्थव्यवस्थेचा मुख्य कणा असलेल्या शेती आणि पशुपालन व्यवसायाला अधिक भक्कम करण्यासाठी महाबळेश्वर पंचायत समिती व श्रीराम विविध कार्यकारी सेवा सोसायटी दूध डेरी लि. भिलार यांच्या संयुक्त विद्यमाने एक स्तुत्य उपक्रम राबवण्यात आला. बेंदूर सणाचे औचित्य साधून भिलार परिसरातील शेतकऱ्यांना मोफत पशुखाद्य मका बियाण्यांचे वाटप करण्यात आले. या उपक्रमामुळे दुग्ध व्यवसायाला चालना मिळण्यासोबतच स्थानिक पातळीवर पौष्टिक हिरव्या चाऱ्याची उपलब्धता वाढण्यास मोठी मदत होणार आहे.
कार्यक्रमादरम्यान पशुवैद्यकीय दवाखाना भिलारचे अधिकारी डॉ. पवनकुमार जाधव यांनी उपस्थितांना मका लागवडीचे तंत्रज्ञान आणि पशुधनाच्या आरोग्याबाबत सखोल मार्गदर्शन केले. कमी खर्चात आणि अल्प कालावधीत उच्च दर्जाचा हिरवा चारा मिळवण्यासाठी पशुखाद्य मक्याची लागवड अत्यंत फायदेशीर ठरते. योग्य व्यवस्थापन आणि आधुनिक पद्धतींचा वापर करून शेतकऱ्यांनी आपल्या पशुधनाचे पोषण सुधारण्यावर भर द्यावा, असा मोलाचा सल्ला त्यांनी या वेळी दिला.
या प्रसंगी महाबळेश्वर पंचायत समितीच्या सभापती शकुंतला चोरमले, पंचायत समिती सदस्या वंदना भिलारे, जिल्हा समन्वय समिती सदस्य प्रवीण भिलारे, राजेंद्र भिलारे, सोसायटीचे चेअरमन शिवाजी दाभाडे, आनंदा भिलारे, गुरेघरचे सरपंच रमेश चोरमले, सुभाष भिलारे, शशिकांत भिलारे, पांडुरंग मोरे व प्रकाश (आबा) भिलारे यांच्यासह परिसरातील शेतकरी व दुग्ध व्यावसायिक मोठ्या संख्येने उपस्थित होते.
उपस्थित सर्व मान्यवरांच्या हस्ते शेतकरी बांधवांना मका बियाण्यांची पाकिटे सुपूर्द करण्यात आली. केवळ पारंपारिक शेतीवर अवलंबून न राहता शासनाच्या कृषी व पशुसंवर्धन विभागाच्या विविध योजनांचा लाभ घेऊन पशुपालन व्यवसाय अधिक सक्षम आणि व्यावसायिक करावा, असे आवाहन मान्यवरांनी या वेळी केले. सण-उत्सवाच्या काळात शेतकऱ्यांच्या हिताचा आणि थेट हाती पडणारा असा उपक्रम राबवल्याबद्दल परिसरातील शेतकरी वर्गातून समाधान व्यक्त होत असून, महाबळेश्वर पंचायत समिती व भिलार सोसायटीच्या या उपक्रमाचे सर्वत्र कौतुक होत आहे.
