पांचगणी न्यूज नेटवर्क
पंढरपूर : सोलापूर जिल्ह्यातून एक अत्यंत दुर्दैवी आणि काळजाचा थरकाप उडवणारी घटना समोर आली आहे. पंढरपूर तालुक्यातील रांजणी गावातील भाविकांवर काळाने भीषण घाला घातला असून, म्हसवड-पंढरपूर मार्गावरील तांदूळवाडी गावाजवळ भाविकांना घेऊन जाणारा टेम्पो थेट रस्त्यालगतच्या विहिरीत कोसळला. या अत्यंत भीषण आणि थरारक अपघातात महिला व लहान मुलांसह तब्बल १४ जणांचा जागीच दुर्दैवी मृत्यू झाला आहे. या घटनेमुळे संपूर्ण सोलापूर जिल्ह्यासह महाराष्ट्रात हळहळ व्यक्त होत असून, रांजणी गावावर दुःखाचा डोंगर कोसळला आहे.
मिळालेल्या प्राथमिक माहितीनुसार, रांजणी गावातील ग्रामस्थ आणि भाविक अत्यंत उत्साहाने सिद्धनाथांच्या दर्शनासाठी गेले होते. देवाचे दर्शन घेऊन आनंदाने आपल्या गावाकडे परतत असतानाच, माळशिरस तालुक्यातील तांदूळवाडी गावानजीक काळाने त्यांच्यावर झडप घातली. चालकाचा वाहनावरील ताबा अचानक सुटल्याने वेगात असलेला टेम्पो थेट रस्त्याशेजारी असलेल्या खोल विहिरीत जाऊन कोसळला. हा अपघात इतका भीषण आणि अनपेक्षित होता की, टेम्पोमधील प्रवाशांना सावरण्याची संधीच मिळाली नाही आणि अनेक जण पाण्याच्या प्रवाहात व गाडीच्या ढिगाऱ्याखाली अडकून पडले.
अपघाताचा आवाज ऐकताच स्थानिक ग्रामस्थांनी तातडीने मदतीसाठी घटनास्थळी धाव घेतली. घटनेचे गांभीर्य ओळखून पोलीस प्रशासन, महसूल विभाग आणि अग्निशमन दलाच्या जवानांनी तात्काळ युद्धपातळीवर बचावकार्य सुरू केले. विहिरीतून टेम्पो आणि नागरिकांना बाहेर काढण्याचे काम तातडीने हाती घेण्यात आले. मात्र, तोपर्यंत १४ निष्पाप जीवांचा अंत झाला होता. या दुर्घटनेतील जखमींना तातडीने उपचारासाठी जवळच्या रुग्णालयात दाखल करण्यात आले असून, मृतांचा आकडा आणखी वाढण्याची भीती व्यक्त केली जात आहे. देवाच्या दर्शनाहून परतणाऱ्या निष्पापांवर ओढवलेल्या या भीषण प्रसंगामुळे परिसरात मात्र प्रचंड संताप आणि तीव्र दुःख व्यक्त होत आहे.
