पाचगणी, दि. ०४ (प्रतिनिधी):
शतकाहून अधिक काळ ज्ञानदान, सुसंस्कार आणि समाजसेवेची अखंड परंपरा जपत शिक्षण क्षेत्रात संपूर्ण महाराष्ट्रात आपली एक वेगळी आणि अढळ ओळख निर्माण करणाऱ्या पाचगणी येथील ऐतिहासिक ‘संजीवन विद्यालया’चा १०४ वा वर्धापनदिन अत्यंत उत्साह, अभिमान आणि सांस्कृतिक वैभवाच्या वातावरणात संपन्न झाला. विद्यार्थ्यांचा अद्भूत कलाविष्कार, बोर्ड परीक्षेत यश मिळवणाऱ्या गुणवंतांचा दिमाखदार गौरव आणि विद्यालयाच्या देदिप्यमान वाटचालीच्या स्मरणाने हा सोहळा उपस्थितांसाठी कायमचा अविस्मरणीय ठरला.
महान मान्यवरांच्या हस्ते दीपप्रज्वलनाने या सोहळ्याची अतिशय मंगलमय सुरुवात झाली. त्यानंतर विद्यालयाच्या १०४ वर्षांच्या प्रेरणादायी इतिहासाची, शैक्षणिक प्रगतीची आणि सामाजिक बांधिलकीची साक्ष देणारी एक विशेष चित्रफित (डॉक्युमेंट्री) प्रदर्शित करण्यात आली. विद्यालयाच्या स्थापनेपासूनचा हा खडतर पण देदिप्यमान प्रवास पाहून उपस्थित माजी विद्यार्थी, शिक्षक आणि पालक भावूक झाले अन् प्रत्येकाचा उर अभिमानाने भरून आला.
वर्धापनदिनाचे मुख्य आकर्षण ठरले ते विद्यार्थ्यांनी सादर केलेले सांस्कृतिक कार्यक्रम. संजीवनच्या बालचमूने सादर केलेले स्वागतगीत आणि मनमोहक नृत्याविष्काराने कार्यक्रमात रंग भरले. तर हिंदू हायस्कूलच्या विद्यार्थ्यांनी सादर केलेली अभ्यासपूर्ण नाटिका आणि महाराष्ट्राच्या समृद्ध सांस्कृतिक वारशाचे दर्शन घडविणारे “देह विठ्ठल”, “गजर माऊलीचा”, “हरिभरी वसुंधरा” व “पाणी हरवलंय” हे संदेशप्रधान कार्यक्रम उपस्थितांची विशेष दाद मिळवून गेले. या सादरीकरणातून कला, संस्कृती आणि ज्वलंत सामाजिक जाणीव यांचा एक सुंदर त्रिवेणी संगम अनुभवायला मिळाला.
शैक्षणिक गुणवत्तेचा सुवर्णकाळ कायम राखत संजीवन विद्यालयाने यंदाही सीबीएसई (CBSE) दहावी व बारावीच्या परीक्षांमध्ये १०० टक्के निकालाची आपली उल्लेखनीय परंपरा कायम राखली आहे. या यशाबद्दल दहावीतील आरव अगरवाल, रेहान पारसनीस, पीयूष पानसरे, सागर सालपे, ऍशले अँथनी तसेच बारावी विज्ञान शाखेतील दीर्घिका बातुलवार, आरव चित्रोडा, अनुज थापलियाल, वाणिज्य शाखेतील ऐश्वर्या साबळे, अनुराग गायकवाड आणि आयजीसीएसई (IGCSE) विभागातील रिदम शर्मा व यश लढ्ढा या गुणवंत विद्यार्थ्यांचा विशेष सत्कार करण्यात आला.
कार्यक्रमाचे प्रमुख पाहुणे आणि ‘नॉर्थ ईस्ट युनायटेड फुटबॉल क्लब’चे सीईओ मंदार तामणे यांनी विद्यार्थ्यांशी संवाद साधताना शिक्षणाबरोबरच क्रीडा, नेतृत्व आणि कौशल्य विकासावर भर देण्याचे आवाहन केले. “जागतिक स्तरावर देशाचे नाव मोठे करण्यासाठी सातत्य, शिस्त आणि सकारात्मक दृष्टिकोन गरजेचा आहे,” असे सांगत त्यांनी संजीवनच्या क्रीडा विकासासाठी सर्वतोपरी सहकार्य करण्याची ग्वाही दिली. यावेळी राष्ट्रीय स्तरावरील प्रसिद्ध गोलकीपर पायल बासुदे यांच्या उपस्थितीने कार्यक्रमाची शोभा आणखी वाढवली.
संस्थेच्या अध्यक्षा शशीताई ठकार यांनी आपल्या अध्यक्षीय मनोगतात ग्रामीण व दुर्गम भागातील विद्यार्थ्यांपर्यंत दर्जेदार शिक्षण पोहोचविण्याच्या संस्थेच्या ध्येयाचा पुनरुच्चार केला. “समाजातील शेवटच्या घटकापर्यंत शिक्षणाची समान संधी पोहोचविणे हीच संजीवनची खरी ओळख आहे,” असे सांगत त्यांनी विद्यालयाच्या पुढील प्रगतीसाठी माजी विद्यार्थ्यांनीही सक्रिय योगदान द्यावे, असे आवाहन केले. वर्धापनदिनानिमित्त विविध क्षेत्रांतील मान्यवरांचा शाल, श्रीफळ व सन्मानचिन्ह देऊन गौरव करण्यात आला.
या सोहळ्यास पाचगणीचे नगराध्यक्ष दिलीपभाऊ बगाडे , विशेष कार्यकारी विश्वस्त अनघा देवी, विश्वस्त अविनाश अडिगे, उमेश त्रिवेदी, बी. जी. थोरात, शरद ठकार, रघुनाथराजे निंबाळकर, सचिन कांबळे तसेच माजी विद्यार्थी आणि पालक मोठ्या संख्येने उपस्थित होते. प्रास्ताविकात प्राचार्य धनंजय शिरूर यांनी विद्यालयाच्या शैक्षणिक, क्रीडा व सहशालेय क्षेत्रातील घोडदौडीचा सविस्तर आढावा घेतला. मुख्याध्यापिका नेहा शहा यांनी सर्व उपस्थितांचे आभार मानले. कार्यक्रमाचे उत्कृष्ट सूत्रसंचालन क्लॅरिस्टा डिसिल्वा आणि आकांक्षा बोंगाळे यांनी केले. तर बसुराज सर, पौर्णिमा पाटील आणि अडिगे सर यांनी प्रमुख पाहुण्यांचा परिचय करून देत विद्यालयाच्या क्रीडा संस्कृतीवर प्रकाश टाकला. ज्ञान, संस्कार आणि गुणवत्तेचा हा शतकाचा वारसा पुढील पिढ्यांपर्यंत अधिक सक्षमपणे पोहोचविण्याचा दृढ निर्धार करत हा सोहळा अत्यंत दिमाखात पार पडला.
