पांचगणी न्यूज नेटवर्क
पांचगणी : ग्रामीण भागातील विद्यार्थ्यांना जागतिक स्पर्धेच्या युगात टिकून राहता यावे आणि त्यांच्यातील सुप्त गुणांना वाव मिळावा, यासाठी जिल्हा परिषद आदर्श शाळा, राजपुरी येथे राबविला जाणारा ‘राजपुरी जिनियस’ हा उपक्रम कौतुकास्पद असून, यामुळे ग्रामीण विद्यार्थ्यांना स्पर्धा परीक्षांची योग्य दिशा मिळत आहे, असे प्रतिपादन सातारा जिल्हा मध्यवर्ती सहकारी बँकेचे संचालक राजेंद्रशेठ राजपुरे यांनी केले.
राजपुरी येथील जिल्हा परिषद आदर्श शाळेत नवीन शैक्षणिक वर्षाच्या प्रारंभी शाळा प्रवेशोत्सव, नवागत विद्यार्थ्यांचे स्वागत, ‘राजपुरी जिनियस’ गुणवंत विद्यार्थी गौरव सोहळा आणि पालक मेळावा अत्यंत उत्साही वातावरणात संपन्न झाला. याप्रसंगी प्रमुख पाहुणे म्हणून ते बोलत होते.
पुढे बोलताना राजेंद्रशेठ राजपुरे म्हणाले की, “आज जिल्हा परिषद शाळांमध्ये आधुनिक तंत्रज्ञान आणि गुणवत्तापूर्ण शिक्षणाचा संगम पाहायला मिळत आहे. येथील शिक्षकांच्या अथक परिश्रमांमुळे ग्रामीण भागातील विद्यार्थ्यांना भविष्यातील स्पर्धात्मक युगात यशस्वी होण्यासाठी मोठी ताकद मिळत आहे. पालकांनीही आता खासगी शाळांच्या मागे न धावता जिल्हा परिषद शाळांवर विश्वास ठेवून आपल्या पाल्यांना येथे प्रवेश द्यावा.”
नवीन शैक्षणिक वर्षाच्या पहिल्याच दिवशी शाळेत येणाऱ्या नवागत चिमुकल्यांचे स्वागत अत्यंत आगळ्यावेगळ्या पद्धतीने करण्यात आले. फुलांनी सजविलेल्या ट्रॅक्टरमधून विद्यार्थ्यांची गावातून वाजत-गाजत आनंदमय मिरवणूक काढण्यात आली. शाळेच्या आवारात आगमन होताच सर्व विद्यार्थ्यांचे पुष्पगुच्छ, शैक्षणिक साहित्य आणि खाऊ देऊन उत्साहात स्वागत करण्यात आले. तसेच शासनाच्या योजनेअंतर्गत सर्व विद्यार्थ्यांना मान्यवरांच्या हस्ते मोफत पाठ्यपुस्तकांचे वितरण करण्यात आले, ज्यामुळे विद्यार्थ्यांच्या चेहऱ्यावर एक वेगळाच आनंद ओसंडून वाहत होता.
’
शाळेच्या वतीने राबविण्यात येणाऱ्या ‘राजपुरी जिनियस’ या अभिनव उपक्रमांतर्गत विविध स्पर्धा परीक्षांमध्ये उल्लेखनीय यश मिळविणाऱ्या गुणवंत विद्यार्थ्यांचा मान्यवरांच्या हस्ते विशेष गौरव करून त्यांना आकर्षक बक्षिसे प्रदान करण्यात आली. हा उपक्रम विद्यार्थ्यांमध्ये लहानपणापासूनच स्पर्धा परीक्षांविषयी आवड निर्माण करण्यास, त्यांच्यातील भीती दूर करण्यास आणि त्यांची बौद्धिक क्षमता विकसित करण्यास अत्यंत उपयुक्त ठरत असल्याचे गौरवोद्गार यावेळी मान्यवरांनी काढले.
कार्यक्रमाच्या सुरुवातीला मुख्याध्यापक अरविंद चोरट यांनी शाळेच्या शैक्षणिक प्रगतीचा सविस्तर आढावा घेतला आणि आगामी वर्षातील भावी नियोजनाची रूपरेषा मांडली. शिक्षक अमोल गायकवाड यांनी प्राथमिक स्तरापासूनच स्पर्धा परीक्षांचे असणारे महत्त्व पालकांना आणि विद्यार्थ्यांना पटवून दिले, तर उद्धव निकम यांनी शाळेत राबविल्या जाणाऱ्या विविध सहशालेय उपक्रमांची सविस्तर माहिती दिली.
निलोफर सय्यद यांनी बक्षीस पात्र विद्यार्थ्यांच्या गौरवपूर्ण यादीचे वाचन केले. या संपूर्ण सोहळ्याचे अत्यंत नेटके आणि उत्कृष्ट सूत्रसंचालन योगिता पोळ, प्राजक्ता राजपुरे आणि विघ्नेश राजपुरे यांनी केले. या कार्यक्रमास राजपुरी परिसरातील पालक, ग्रामस्थ, शिक्षणप्रेमी आणि मान्यवर मोठ्या संख्येने उपस्थित होते. सर्वांनी शाळेच्या या नाविन्यपूर्ण उपक्रमांचे आणि डिजिटल वाटचालीचे विशेष कौतुक केले.
