पाचगणी न्यूज नेटवर्क
पाचगणी : जागतिक पर्यावरण दिनाचे औचित्य साधून पाचगणी गिरीस्थान नगरपरिषद आणि नेस्ले प्रणीत ‘हिलदारी प्रकल्प’ यांच्या संयुक्त विद्यमाने पर्यटननगरीत पर्यावरण संवर्धन, शाश्वत कचरा व्यवस्थापन आणि स्वच्छता जनजागृतीसाठी विविध नाविन्यपूर्ण उपक्रमांचे आयोजन करण्यात आले होते. या माध्यमातून ‘कचऱ्यापासून संसाधनाकडे’ (Waste to Resource) आणि ‘शाश्वत पर्यटनस्थळ’ ही संकल्पना अत्यंत प्रभावीपणे राबवून पाचगणीने पुन्हा एकदा पर्यावरणपूरकतेचा नवा वस्तुपाठ राज्यासमोर ठेवला आहे.
या पर्यावरण दिनाचे मुख्य आकर्षण ठरले ते जगप्रसिद्ध टेबल लँड परिसरात उभारण्यात आलेले ‘अपसायकल्ड सार्वजनिक फर्निचर’. शहरात गोळा होणाऱ्या आणि निसर्गाला घातक ठरणाऱ्या कमी मूल्याच्या प्लास्टिक कचऱ्यावर (Low-Value Plastic) प्रक्रिया करून हे आकर्षक फर्निचर तयार करण्यात आले आहे. या अनोख्या आणि पर्यावरणपूरक उपक्रमाचे लोकार्पण सातारा जिल्ह्याचे माननीय जिल्हाधिकारी यांच्या हस्ते अत्यंत उत्साहात संपन्न झाले. कचरा म्हणून फेकून दिलेल्या प्लास्टिकचे एका देखण्या आणि उपयुक्त सार्वजनिक सुविधेत रूपांतर कसे करता येते, याचे हे एक उत्तम उदाहरण ठरले आहे. या उपक्रमामुळे पाचगणीत येणाऱ्या पर्यटकांना आता जबाबदार पर्यटनाचा संदेश मिळणार आहे.
या गरिमापूर्ण सोहळ्यासाठी उच्चस्तरीय सनियंत्रण समितीचे अध्यक्ष व सदस्य, उपविभागीय अधिकारी, तहसीलदार, पाचगणी नगरपरिषदेचे मुख्याधिकारी, विविध विभागांचे शासकीय अधिकारी, पत्रकार संघाचे प्रतिनिधी आणि शहरातील अनेक मान्यवर मोठ्या संख्येने उपस्थित होते.
स्वच्छतेच्या ‘दूत’ कर्मचाऱ्यांच्या गौरवाची घोषणा
पाचगणी शहर स्वच्छ, सुंदर आणि हरित ठेवण्यासाठी ऊन, वारा, पाऊस कशाचीही परवा न करता अहोरात्र राबणाऱ्या स्वच्छता कर्मचाऱ्यांच्या पाठीवर नगरपरिषदेने कौतुकाची थाप दिली आहे. शहर स्वच्छतेत मोलाचे योगदान देणाऱ्या कर्मचाऱ्यांचे मनोबल उंचावण्यासाठी आणि त्यांच्या कामाला समाजात सन्मान मिळवून देण्यासाठी यंदापासून “सर्वोत्कृष्ट स्वच्छता कर्मचारी पुरस्कार” देण्याची महत्त्वपूर्ण घोषणा यावेळी करण्यात आली. नगरपरिषदेच्या या निर्णयाचे सर्व स्तरांतून स्वागत होत आहे.
हा संपूर्ण उपक्रम यशस्वी करण्यासाठी आरोग्य विभाग प्रमुख स्वाती पाटील, सिटी कोऑर्डिनेटर ओंकार ढोले, नगरपरिषदेचे सर्व अधिकारी, कर्मचारी, मुकादम तसेच हिलदारी प्रकल्पाच्या संपूर्ण टीमने विशेष परिश्रम घेतले.
पाचगणी नगरपरिषद आणि हिलदारी प्रकल्पाच्या या संयुक्त प्रयत्नांमुळे शहरात केवळ कचरा व्यवस्थापनच होत नसून, लोकसहभागातून एक मोठी पर्यावरण चळवळ उभी राहत आहे. या उपक्रमांमुळे पाचगणीची ओळख देश-विदेशात एक स्वच्छ, हरित आणि ‘जबाबदार पर्यटनस्थळ’ म्हणून अधिक दृढ होत असल्याचा विश्वास याप्रसंगी उपस्थितांनी व्यक्त केला.
