पांचगणी न्यूज नेटवर्क
सातारा : मेहनत , सातत्य आणि योग्य मार्गदर्शनाच्या जोरावर यशोशिखर गाठणाऱ्या गुणवंतांच्या कौतुकाने सातारा शहर न्हाऊन निघाले. सर आइन्स्टाईन अकॅडमीच्या वतीने आयोजित करण्यात आलेल्या ‘उत्कर्ष पर्व २०२६’ या दिमाखदार सोहळ्यात IIT-JEE, NEET आणि MHT-CET या राष्ट्रीय व राज्यस्तरीय स्पर्धा परीक्षांमध्ये दैदिप्यमान यश मिळवणाऱ्या विद्यार्थ्यांचा गौरव करण्यात आला. NIT, COEP यांसह देशातील नामांकित शासकीय महाविद्यालयांमध्ये प्रवेश मिळवून आपल्या कुटुंबासह अकॅडमीचे नाव उंचावणाऱ्या या विद्यार्थ्यांचा सत्कार पाहताना उपस्थित पालकांच्या डोळ्यांत आनंदाश्रू तरळले.
सर आइन्स्टाईन अकॅडमीच्या वतीने आयोजित या सत्कार समारंभाने संपूर्ण कार्यक्रमस्थळी उत्साह आणि अभिमानाचे वातावरण निर्माण केले होते. या सोहळ्याप्रसंगी बोलताना अकॅडमीचे कार्यकारी संचालक प्रा. श्रीरंग पंडित यांनी सर्व गुणवंतांचे अभिनंदन केले. विद्यार्थ्यांचे हे यश केवळ त्यांच्या वैयक्तिक मेहनतीचे फलित नसून त्यामागे पालकांचा दृढ विश्वास, शिक्षकांचे अथक मार्गदर्शन आणि अकॅडमीने निर्माण केलेले शिस्तबद्ध व सकारात्मक शैक्षणिक वातावरण असल्याचे त्यांनी नमूद केले. विद्यार्थ्यांनी भविष्यातही अशीच मोठी स्वप्ने पाहून ती पूर्ण करण्यासाठी सातत्याने प्रयत्नशील राहावे, असा प्रेरणादायी संदेशही त्यांनी या वेळी दिला.
कार्यक्रमात सर्वात भावूक क्षण ठरला तो विद्यार्थ्यांच्या सत्काराचा. आपल्या मुला-मुलींनी घेतलेली मेहनत आणि देशातील सर्वोत्तम शैक्षणिक संस्थांमध्ये मिळविलेला प्रवेश डोळ्यांसमोर पाहताना अनेक पालकांना गहिवरून आले. भावना व्यक्त करताना पालकांनी अकॅडमीबद्दल कृतज्ञता व्यक्त करत, “आमच्या मुलांच्या उज्ज्वल भविष्यासाठी सर आइन्स्टाईन अकॅडमी हीच सर्वोत्तम जागा आहे,” असे आवर्जून सांगितले. केवळ अभ्यासक्रम पूर्ण न करता स्पर्धा परीक्षांची तयारी, अभ्यासाची शिस्त आणि विद्यार्थ्यांमध्ये आत्मविश्वास निर्माण करण्याचे काम अकॅडमीने अतिशय प्रभावीपणे केल्याचे पालकांनी नमूद केले.
या दिमाखदार सोहळ्यास श्री राजेश सप्रे, श्री महेश टिळेकर आणि श्री भगवान ताटे हे मान्यवर शिक्षक तसेच श्री शेखर जाधव विशेष पाहुणे म्हणून उपस्थित होते. उपस्थित मान्यवरांच्या हस्ते सर्व गुणवंत विद्यार्थ्यांचा विशेष सन्मान चिन्ह व प्रमाणपत्र देऊन सत्कार करण्यात आला. कार्यक्रमाचे प्रभावी आणि ओघवते सूत्रसंचालन अकॅडमीचे संचालक प्रा. जयंत गंभीर यांनी केले. त्यांनी विद्यार्थ्यांच्या यशोगाथा आणि मेहनतीची सांगड घालत संपूर्ण कार्यक्रमात एक वेगळीच ऊर्जा निर्माण केली.
’उत्कर्ष पर्व २०२६’ हा सोहळा केवळ सत्कारापुरता मर्यादित न राहता विद्यार्थी, पालक आणि शिक्षक यांच्या त्रिवेणी संगमाचा प्रेरणादायी उत्सव ठरला. NIT व COEP सारख्या संस्थांमध्ये प्रवेश मिळवून अकॅडमीच्या यशाचा आलेख उंचावणाऱ्या या गुणवंतांनी, “हे यश म्हणजे अंतिम टप्पा नसून नव्या ध्येयांची सुरुवात आहे,” या संकल्पाने पुढील वाटचालीसाठी पाऊल टाकले.
