पांचगणी न्यूज नेटवर्क
महाबळेश्वर,: पर्यटनाचा हंगाम आणि जोरात सुरू असलेल्या परतीच्या पावसात महाबळेश्वर तालुक्यातील मेटगुताड येथून एक अत्यंत दुर्दैवी बातमी समोर आली आहे. मेटगुताड येथील एका प्रसिद्ध हॉटेलात काम करणाऱ्या कर्मचाऱ्याचा पावसाने ओलसर झालेल्या जिन्यावरून पाय घसरून खाली पडल्याने डोक्याला गंभीर दुखापत होऊन जागीच मृत्यू झाला. पांडुरंग उर्फ कोंडीबा चव्हाण (वय ४३, रा. केळघर, ता. जावळी) असे या दुर्देवी घटनेत प्राण गमावलेल्या कामगाराचे नाव आहे. ऐन पर्यटनाच्या मोसमात कामावर असतानाच घडलेल्या या अपघातामुळे मेटगुताड परिसरासह त्यांच्या मूळ केळघर गावात हळहळ व्यक्त केली जात आहे.
मिळालेल्या माहितीनुसार, सध्या महाबळेश्वर व परिसरात पर्यटकांची मोठी गर्दी असून हॉटेल व्यवसायात मोठी धावपळ सुरू आहे. पांडुरंग चव्हाण हे गेल्या काही वर्षांपासून मेटगुताड येथील ‘माऊंटन ब्रिज’ या हॉटेलात प्रामाणिकपणे कामगार म्हणून सेवा बजावत होते. घटनेच्या दिवशी हॉटेलात येणाऱ्या पर्यटकांच्या सोयीसाठी ते इमारतीतून गादी आणण्यासाठी जात होते. सततच्या मुसळधार पावसामुळे हॉटेलचा बाहेरचा जिना संपूर्ण ओला आणि निसरडा झाला होता. गादी घेऊन जाताना अचानक त्यांचा पाय या ओल्या जिन्यावरून निसटला आणि ते मोठ्या वेगाने खाली कोसळले. या भीषण अपघातात त्यांच्या डोक्याच्या मागील भागाला जोरदार मार बसल्याने प्रचंड रक्तस्राव झाला.
घटनेचे गांभीर्य ओळखून सहकाऱ्यांनी त्यांना तातडीने उपचारासाठी जवळच्या रुग्णालयात दाखल करण्याचा प्रयत्न केला; मात्र डोक्यातील दुखापत अत्यंत खोल व जीवघेणी ठरल्याने उपचारापूर्वीच त्यांची प्राणज्योत मालवली. घरातील कमावता आणि कष्टाळू पुरुष कामाच्या ठिकाणीच अशा प्रकारे अपघाती मृत्युमुखी पडल्याने चव्हाण कुटुंबीयांवर दुःखाचा डोंगर कोसळला आहे. या घटनेची नोंद स्थानिक पोलिसांत करण्यात आली असून पुढील कायदेशीर प्रक्रिया सुरू आहे.
पर्यटनस्थळांवरील सुरक्षेचा प्रश्न ऐरणीवर
महाबळेश्वर, पाचगणी आणि मेटगुताड यांसारख्या अतिवृष्टीच्या भागात पावसाळ्यात दगडी जिने, टाईल्स आणि पायऱ्यांवर शेवाळ साचून किंवा पाणी साचून अतिशय घसरडे वातावरण तयार होते. पर्यटकांची गर्दी सांभाळताना हॉटेल कर्मचाऱ्यांना दिवस-रात्र धावपळ करावी लागते. अशा वेळी ओल्या पायऱ्यांवर सुरक्षित रबर मॅट बसवणे अथवा कामगारांसाठी सुरक्षेच्या उपाययोजना करणे किती गरजेचे आहे, हे या दुर्दैवी घटनेने पुन्हा एकदा अधोरेखित केले आहे.
